Hæfileg refsing?

Ég þarf smá aðstoð frá dómstóli götunnar núna.

Þannig er mál með vexti að undirrituð gekk í heilagt hjónaband fyrir rétt um ári síðan. Sem væri ekki frásögu færandi nema vegna þeirra staðreyndar að helmingurinn minn (sem ég kýs að kalla verri helminginn núna), "gleymdi" fyrsta brúðkaupsafmælisdegi okkar.

Eftir að hafa leitað mér álits reyndari kvenna í þessum málum þá hef ég komist að því að refsirammi fyrir svona brot er allt frá nokkurra daga "silence treatment" að notkunar rottueiturs. Í ljósi þess að ekki er nema einungis rétt rúmt ár frá því að brúðkaupið átti sér stað og því ekki erfitt að muna þetta og þar af leiðandi engin afsökun þá skilst mér að mér sé heimilt að nýta þennan refsiramma nokkuð vel.

Verri helmingurinn ber fyrir sig "að hafa ekki haft hugsun á þessu", sem mér finnst bara undirstrika einbeittan brotavilja. 

Brotaþoli er ekki kröfuharður og hefði verri helmingurinn haft rænu á að týna fíbbla á leiðinni heim úr vinnunni þá hefði refsingin mildast verulega. Reyndar gerði verri helmingurinn tilraun til að breiða yfir mistök sín þegar honum var bent á þau og eldaði sæmilegan mat. En þar sem hann gerði það ekki af eigin frumkvæði, og á síðustu stundu þá er svo augljóst að það var gert í þeim tilgangi að sleppa betur og verður því þessi máltíð ekki tekin til greina og nýtist því ekki til refsilækkunar.

Með vísan til forsendna hefur brotaþoli því komist að þeirri niðurstöðu að ekki verði litið framhjá því hversu alavarlegt málið er og er því hæfileg refsing nokkurra daga silence treatment auk laxerolíu. Er það von mín að þegar líður að brúðkaupsafmæli næstu ára þá muni verri helmingurinn muna eftir þessum degi. Ef ekki vegna brúðkaupsins þá alla vega að hann muni eftir löngum samskiptum við Gustavsberg, slæma ristilkrampa og gyllinæð og afhverju hann upplifði það!

Komi fram nægjanlegar góðar hugmyndir er brotaþoli í fullum rétti að þyngja þessa refsingu. 

Hugmyndir óskast!

 

 

Athugasemdir

[Elísabet (IP-tala skráð) 12.6.2007 kl. 13:41]

Þú er frábær penni Drilla.  Plástrabloggið og svo þetta ... ROFL ...

[Haukur Viðar, 12.6.2007 kl. 14:05]

Fokk.....kallgarmurinn alveg úti að skíta

Mætti ekki sleppa honum og flokka þetta bara sem elliglöp? 

[Ragga (IP-tala skráð) 12.6.2007 kl. 17:48]

Láttu hann kenna á því.

[Ester Júlía, 13.6.2007 kl. 06:41]

Hann verður alla vega úti að skíta ef af laxerolíumeðferðinni verður . Nokkur ráð:

1. Setja vatn í dropateljara og láta drippa í eyrun á honum til að vekja hann (skilst þetta sé MJÖG óþægilegt. 

2. Hamra á því (eins og Haukur segir) að hann sé orðinn gamall og gleyminn. (Pirrandi og hver vill viðurkenna það?)

Mér dettur ekkert meira í hug ( er nýmætt í vinnu og ROSALEGA syfjuð). En þetta er jú nánast ófyrirgefanlegt..en ég get huggað þig með því að flestir karlmenn gleyma þessum degi.. m.a. minn